#173: DanièlOlivar - Re: Agachatz d'ont venon las signaturas

...son seguits per d'elegits, de totes los bòrds, perque son discors es manipulator : se presentan coma los defensors de Provença e de sa lenga (causas que degun pòt contestar), fan signar los elegits sus aquel principi, puèi dison que los elegits an signat "countro lis oucitan". Manipulacion grossièra, que fonciona, d'autant mai que eles an la conviccion rabiosa e ferotja que l'occitanisme es un enemic pièger per "sa lenga" que lo centralisme escanaire... Veson manca pas que sens l'organizacion militanta de l'occitanisme, sos professors de "provençal" (perqué pas aquel mot, per parentèsi, se correspond mai a las espèras de la populacion provençala, puèi qu'òm pòt mostrar l'ample de la lenga d'òc que lo provençal n'es una compausanta importanta ?), sos professors de provençal, donc, aurian pas jamai agut un CAPES...

Es un pauc çò desesperant dins d'unas mentalitats e reaccions : preferir la mòrt de la lenga, l'embarrament auturos puslèu que l'accion collectiva, responsabla, recampaira, amb sas avançadas e sas trabucadas.... Preferir la mort a la vida, qué...

Per l'accion del couleitieu de cap als elegits, Cf, sul sit de la FELCO : http://www.felco-creo.org/mdoc/detail_fr.php?categ=deputat&id=193 e http://www.felco-creo.org/mdoc/detail_fr.php?categ=deputat&id=935

Me sembla evident que de tant que i aurà pas, en Provença, una accion PUBLICA PASIBLA qu'amassarà los felibres e los occitanistas non sectaris sus una basa de lucha per una lenga viva, la carrièra e la plaça publica seràn laissadas a aquel mond del couleitieu, malgrat sa violéncia verbala, son incultura e sas messorgas...

Lo manifèste del PEN-club es una primièra etapa e i vesi amb plaser de molons de signaturas provençalas. Basta lo mond comprenguèsson que lcal ajudar e demultiplicar d'accions d'aquela mena.

#174: Maria Joana Verny - se ridiculizan ? Ailàs, non...

Siáu consent, de segur. Aquò dich, i a en Provença de relacions mai pasibles entre occitanistas e mistralencs que o vòu far crèire lo Collectiu Provença : lo jornau "Provènço d'Aro", de mitans culturaus neutres sus la question de l'apartenéncia dau provençau a l'ensems occitan, la preséncia d'un representant dau Counsèu de l'Escri mistralen au consèu lingüistic dau Congrès permanent de la lenga occitana.

En realitat, lo Collectiu Provença es pas solament antioccitanista : es tanben antimistralenc per sa volontat suicidària de negar l'evidéncia mistralenca e anteriora a Mistral de l'unitat de la lenga nòstra, per son refús de chifrar seriosament a la difusion dau provençau dins la societat e dins l'ensenhament, de desplaçar la question fondamentala de la feblesa dau provençau ò de l'occitan vèrs un absurde conflicte de grafias.